Sprüchli & Zeichnige

emotionentraditionen erleben

Simeli - Sämeli

Simeli - Sämeli - Santiglaus, wo holsch du d'Guetzlisache?

I hols nid do, i hols nid dert, i tue si sälber bache!

Simeli - Sämeli - Santiglaus, wo tuesch du Pfitze binde?

Im tiefe, tiefe Tannewald, wo niemerts mi ka finde.

Simeli - Sämeli - Santiglaus, wänn kunsch zu uns ins Stedtli?

Wänn's dunkel wird, wänns Lämpli brennt , wänn d' Kinder mien ins Bettli.

Santiglaus und Eseli

Es nachtet scho und schneyelet, du liebi Zyt ganz grüsli,

de Santiglaus leit jetzt syn Mantel aa und bschliesst druf no sy Hüsli.

Er holt de Schlitte us em Schopf, spannt s'Eseli gschwind a

und ladet d'Säck und Pfitze druf, wo'n er für d'Chind mues ha.

Hü Trampeli, seit er, s'isch Zyt, de Wäg is Stedtli isch no wyt!

Mier händ hüt Z'Obe gar viel z'tue, hü Trampeli lauf ganz artig zue!

Wie sind die Säck so dick und schwär, wär chunt ächt Pfitze über wär?

Der Santiglaus weiss alles ganz genau, drum Kinder, pitti folged au.

Holderihi - Holderiho

Holderihi - Holderiho, hüt wird gwüss de Chlaus noch ko.

Er chunnt dur de Schnee und dur de Wind, chunt zu jedem barve Kind.

Holderihi - Holderho, hüt wird gwüss de Chlaus no ko.

Was isch das für es Liechtli

Was isch das für es Liechtli, was isch das für en Schy?

De Santiglaus mit dä Lattärne, lauft grad de Wald dury.

Syn Esel, dä hät glade, er rieft: ii - ah, ii - ah,

hüt darf i mit mym Meischter, emol is Stedtli gah.

Im Sagg, do hets viel Nusse, au Läbchueche, Zimetstärn,

die trag i wär's en Zentner, für liebi Chinder gärn!

Dur de Wald

Dr Santiglaus lauft dur de Wald,

es isch ganz garschtig und au bitter kalt.

Doch er möchti zu de Kinder goh,

wo sini Mahnig ernscht händ gnoh.

S'Eseli treit de Sagg zum sie z'beschängge,

dass sie wyterhin tien folge und dra dängge,

s'isch wohr was d'Eltere sage,

sie wänd uns jo nur guet lengge.

Sit hüt

Santiglaus, du luegsch mi fründlig a

und i ha di gärn, du liebe Ma.

I versprich dir, das i sit hüt

Freud wot mache dir und all ne Lüt.

Diese Webseite verwendet Cookies. Hier kannst du auswählen, welche Cookies du zulassen willst und deine Auswahl jederzeit ändern. Klickst du auf 'Zustimmen', stimmst du der Verwendung von Cookies zu.